FERRIS WHEEL

Ferris Wheel

Nakakatuwa, nasasabik akong
maranasan ang ibang klaseng
sasakyan na malimit na
sinasakyan ng magkasintahan.

Nakakakilig, lalo na nung sinabi
mong sasamahan mo ako
Paniguradong nagmamahal ka na rin ng palihim sakin
kagaya ng ginagawa ko

Nakakakaba, nung sinubukan kong sumakay.
Di ko alam ang kahihinatnan
pero nandun ka kaya nagtiwala ako.
Unang beses to kaya paghahandaan ko.

Napakasaya, matapos ang iilang ikot,
nananatiling nakatuon sakin ang iyong mga mata.
Ramdam kong ligtas ang sinasakyan
pero nahulog ako sa mga ngiti mo.

Nakakapanibago, hawak mo ako
kani kanina lang.
Pero kasabay ng paghinto ng sasakyan
ang pag bitaw mo sa aking mga kamay.

Nakakalula, oo tunay na nakakalula
lalo na nang nakita kitang nasa tuktok uli
pero sa pagkakataong ito, kasama niya,
habang ako naman nasa baba pinagmamasadan ka.

Nakakalito, biglaan mo kong hinayaan sa dagat ng mga tao.
Nasan ka na?
Hindi ba't kasama lang kita kanina?
Teka anong nangyayari?

Napakahirap, dahil dapat na
kitang pakawalan
kahit di ka naman talaga naging akin
simula pa nung una.

Nakakagulat, nung nakita ko
yung ibang klaseng ngiti mo
na di ko nakita nung magkasama tayo.
Mas masaya ka nga sakanya.

Napakasakit,

dahil iniwan mo ako ng walang paalam.

Na di alam ang dahilan.

At kailangan kitang pakawalan.

Nakakatakot,
dahil baka mahulog muli ako at mapaikot
ng sasakayang ito sa muling subok.
Iyon na marahil ang una't huling sakay ko sa Ferriswheel

Nakakasisi, sana pala nung simula pa lang
ay di na ko nangahas
na magpakasaya sa isang bagay
na pinaikot lang pala ako bandang huli.